1Cor 5 | NdeIBE | STEP | Kuyabikwa impela ukuthi kulobuxhwali bobufebe phakathi kwenu, njalo obohlobo olungenzakaliyo laphakathi kwabangakholwayo: Umuntu uthatha umkayise.

1 Corinthians 5

Mxotsheni Umzalwane Ogangileyo!

1 Kuyabikwa impela ukuthi kulobuxhwali bobufebe phakathi kwenu, njalo obohlobo olungenzakaliyo laphakathi kwabangakholwayo: Umuntu uthatha umkayise. 2 Njalo lina liyazigqaja! Kwakungamelanga libe buhlungu kakhulu yini limsuse enhlanganweni yenu umuntu owenze lokhu na? 3 Lanxa mina ngingekho mathupha, ngilani emoyeni. Njalo sengimahlulele lowo owenze lokhu, kungathi kade ngikhona. 4 Lapho libuthene ebizweni leNkosi yethu uJesu ngilani ngomoya, lamandla eNkosi yethu uJesu akhona, 5 umuntu lo mnikeleni kuSathane, ukuze imvelo yakhe yesono ichithwe lomoya wakhe usindiswe ngosuku lweNkosi.

6 Ukuzincoma kwenu akulunganga. Kalikwazi yini ukuthi imvubelo encane ibilisa inhlama yonke? 7 Susani imvubelo endala ukuze libe yinhlama entsha engelamvubelo – njengoba linjalo impela. Ngoba uKhristu, iwundlu lethu lePhasika, lihlatshiwe. 8 Ngakho, kasigcineni uMkhosi, hatshi kulemvubelo endala, imvubelo yenzondo lobubi, kodwa lesinkwa esingelamvubelo, isinkwa sobuqotho leqiniso.

9 Ngalilobela encwadini yami ukuba lingahlanganyeli labantu abayizixhwali zezifebe – 10 ngingatsho abantu bakulo umhlaba abagangileyo, loba abayizihwaba lamaqili, loba abakhonza izithombe. Uma kunjalo kuzamele liwutshiye umhlaba lo.

11 Kodwa khathesi ngililobela ukuba lingahlanganyeli lomuntu ozibiza ngokuthi ngumzalwane kodwa exhwalile eyisifebe loba isihwaba, umkhonzi wezithombe loba umnyeyi, isidakwa loba iqili. Umuntu onjalo lingadli laye.

12 Kungumlandu wami na ukuba ngahlulele abangaphandle kwebandla? Akumelanga lahlulele labo abaphakathi na? 13 UNkulunkulu uzakwahlulela labo abangaphandle. “Mxotsheni umuntu omubi phakathi kwenu.”